Ditulis Oleh : A.S Patimarajo



Kereta mandaki angok awak nan sasak. Ijan lah takah itu caro iduik. Marasai badan awak surang. Caliak sajolah apo nan dipabuek urang. Kok elok turuik an. Kok buruak  jawuhi.

Baitu nasihat guru tuwo ka Mak Uniang, dulu maso lalok di surau, di tahun tujuahpuluahan. Kato nasihat  tunjuak aja  guru ko, tanyato manganduang banyak hikimah sampai kini. Paguno dipakai salamo iduik. Apo lai di zaman kamajuan, banyak urang nan lapeh sumbek.

Maso kini, dek urang lapeh sumbek, sado nan takana dilapehan sakandak hati. Sado nan tapikia ditulih jo ujuang jari. Mako dikatahui dek urang lain, isi hati nan sabananyo. Tu mah, ado lo kawan nan kalusuak panja mancaliak urang bakumpua samo samo di Batawi, satiok duo hari  bulan, akia tahun. 

Manulih kawan tu bacaracau. Bakicau kawan tu takah murai. Kato kawan tu: kumpua kumpua tak ado mufaat. Kumpua tak ada faidah. Kumpua kumpua mubazia. Kumpua kumpua ndak tantu ojok. Pokoknyo macam macam sumpah sarapah baliau muntahan, untuak mamburuak an, urang nan kumpua kumpua.

Samantaro urang payi jo pitihnyo. Urang barengkek jo kacionyo surang. Urang sato jo niat baiak. Urang tabang sakalian manamui dunsanak jo guru guru. Urang tibo manyari kasangan. Apo lo kok jadi marusuah ka badan awak.

Mimintak urang tu ka awak? Indak. Manggaduah urang tu ka awak? Tanyato indak. 

Malah urang nan tibo ka situ dijamu jo makanan dek amak amak sarato kawan nan lain. Diagiahnyo aia minum jo nasi. Dusadiokan payuang untuak bataduah. Ba a mako dek awak  tatap juwo manyakik. 

Mako tabaco dalam kitab: pado hati mareka itu ado panyakik. Kamudian manambah Allah akan raso sakik. Mako mareka mandapek azab nan padiah karano hati mareka tu duto.

Jadi sabananyo, kecek guru tuwo, sumbu panyakik tu di hati. Kalau hati sanang panyakik hilang. Kalau hati sakik bakapanjangan, panyakik datang tak diundang.

Carito ko diulang baliak dek Mak Uniang ka Malanca sudah sumbayang subuah pagi tadi. 

Malanca tamanuang. Pangananyo malayang ka monas. Mancaliak foto foto hasia jepret Mak Adang dari Nagari Karamat...

Sumber:pasbana.com
DOWNLOAD APK APLIKASI ANDROID BERITA RANAH MINANG


   

Posting Komentar

Diberdayakan oleh Blogger.