Ditulis Oleh : A.S Patimarajo



Malanca sato lo ujian jadi pagawai pakan nan lapeh. Ujian nan kini babeda jo ujian maso Mak Uniang tahun 90-an dulu. Maso dulu tu Mak Uniang ujian ampek kali. Satiok tahap diumuman di surek kaba.

Paratamu Mak Uniang diuji kamampuan akademik. Soalnyo saratuih limo puluah. Nan diuji pe em pe, pangatahuan alam, pangatahuan sosial, geografi, bahaso Indonesia, bahaso Inggrih. Tigo hari sudah ujian tatulih di Kota Padang, nampak hasianyo di surek kaba Haluan, Singgalang jo Semangat. 

Namo namo jo nomor nan kalua di surek kaba tu, urang nan luluih sajo. Sudah tu nan luluih ko di uji pulo psikologinyo di IKIP Padang. Ujiannyo mancocok an kotak kotak sarato manambahan angko angko. Tigo hari sudah tu kalua lo baliak namo nan luluih, di koran Singgalang, Haluan jo Semangat.

Nomo namo nan luluih ko dipanggia pulo baliak ujian kasihatan di rumah sakik umun. Dicaliak sagalo panyakik. Mulai ukua  tensi, gulo darah, panyakik lua, panyakik dalam. Sampai gigi jo garaman. Tigo hari sudah tu kalua namo namo nan luluih di surek kaba Haluan, Singgalang jo Semangat. 

Tarakhir namonyo uji nampak muko. Sakali ko diuji bana dek Pak Gubenur. Dicaliak langsuang dek apak tu, ba a mode badan, caro bajalan, caro mangecek. Diujinyo pulo dek Pak Gubenur mangecek jo bahaso Inggirih. 

Joloangnyo, ditanyo jo bahaso awak, "Dimaa kampuang?" tanyo Pak Gubenur. 

"Di Batusangka, Pak," jawek Mak Uniang.

Sudah tu ditanyo jo bahaso Indonesia, "Apa kegiatan saudara saat ini?" 

"Saya seorang wartawan, Pak," jawek Mak Uniang mantap.

"Ceritakan kepada saya perjalanan hidup saudara dengan bahasa Inggris," mintak Pak Gubenur.

Mulailah Mak Uniang kalusuak panja, kalangkabuik. Tapi karano lurah layi babatu, ijuak layi basaga, sado barah sado ditanak. Akianyo layi salasai sajo jalan bendi. Luluih Mak Uniang jadi pagawai maso itu. Kalua namo di surek kaba.

Kini ujian langsuang nampak hasianyo, sudah diuji. Kadang awak ujian di dalam, kawan lah tahu bara kamampuan awak mancaliak komputer di lua. Baru sajo sudah diuji katahuan lulus indaknyo. Di uji di Bukiktenggi, Malanca langsuang tamanuang. Nilainyo randah. Ndak luluih.

"Sulik bana bahan ujian tu, Nca?" tanyo Mak Uniang ka Malanca sudah sumbayang subuah pagi tadi.

'Dek awak taraso sulik, Mak. Tapi kawan awak ado juwo nan luluih," jawek Malanca jo suaro lunak.

"Itu aratinyo alun nasip untuak luluih kini lai, Nca. Saba sajolah. Ulang liak musim kan datang," baleh Mak Uniang.

"Kalau Mak Uniang bara kali sato ujian mako luluih, Mak," tanyo Malanca.

"Tigo kali gagal jadi tantara. Sakali gagal jadi hakim. Sakali gagal jadi jaksa. Duo kali gagal jadi pagawai. Sudah tu ulang liak tes pagawai baru luluih," jawek Mak Uniang maagiah sumangek.. 

Malanca, maangguak. Sabab inyo baru tigo kali sato ujian jadi pagawai....

Sumber:pasbana.com
DOWNLOAD APK APLIKASI ANDROID BERITA RANAH MINANG


   

Posting Komentar

Diberdayakan oleh Blogger.