Ditulis oleh  : A S Patimarajo
Pasbana.com -- Tasabuik dalan catatan lamo, tajadi pado sabuah nagari,  Mak Inggih balawan jo Datuak Kayo marabuik kurisi kapalo kampuang. Anak anak dusun  buncah. Panyababnyo, karano angek tadah pado galeh.

Mak Inggih basuo jo Datuak Kayo di galanggang rami, kaduonyo nampak biaso  sajo. Akrab. Hanyo pandukuang  masiang masiang  saliang mancibia.

Ado nan maimbauan gala garundang ka pihak lawan. Sabaliaknyo ado pulo manyabuik lawannyo kalaluwang. 
Garundang  tu jaleh anak koncek babadan bulek, ikuanyo ketek. Lagak takah buayo baranang  di aia dangkek.

Samantaro kalaluwang  lalok sunsang, kaki ka ateh kapalo ka bawah. Karano tu, kecek urang sabah pikirannyo tabaliak. Sado nan talatak  rancak, nampak dek inyo  salah pasang. Tambah pulo lalok siang, tabang sanjo hari, mancari makan tangah malam.

Kaduo balah pandukuang ko asiak maintai taruah. Jikok ado  langkah sumbang, itu bana kasampatan mampaujanan garam lawan. Dihantam sampai abih. Ditumbuak sampai caia. Lah tingga dadak digiliang  sampai lakek.

Hari hari siaran makin angek. Mandanga  panah kato bakatutuih barapi rapi, takana dek Mak Uniang maso ketek dulu di kampuang, batandiang  main bola limau, di laman surau  patang hari.

Banyak caro nan dibuek anak anak maso itu, untuak mangaluakan paluah. Sarupo bauji kacang lari ateh pamatang. Barabuik  buah dari parak ka parak. Baradu capek manjek batang macang. Nan galik  yo main bola limau di halaman surau. Kadang kadang di  jalan langang,  manjalang  rumah sikola.

Main ko dimulai patang patang. Salasai manjalang mugarik, sakijok tontoang kababunyi hari mulai kalam. Di sinan tantu kalah manang.

Sakali wakatu, di jalan langang tadi, sado anak nan bakumpua  ka main bola. Ruponyo sasudah dibagi samo banyak, balabiah hitungan surang pamain. Mako nan surang ko disapakati manjadi  maju kacau. Aratinyo, buliah maarak bola ka maa katuju dek inyo.

Suko hatinyo sajo. Buliah ka gawang A, buliah pulo ka gawang B. Tapi nan dimintak,  inyo musti adia dalam bamain. Karano tu, nan maju kacau ko, ndak buliah mancetak gol. Cukuik maarak bola sajo sahinggo tangah lapangan.

Untuak babuek adia iko pulo, si Maju Kacau tatap mambantu kiper kaduo balah pihak. Kalau bola barek ka A mako inyo sato manoloang A. Jikok bola barek ka B, mako inyo maoloang B. Aratinyo kasaimbangan bamain talatak di kaki Maju Kacau.

Wakatu tu, main tatap aman. Ndak ado masalah. Walau ado nan kalah, ado nan manang. Tapi ndak ado nan manyalahan si Maju Kacau. Sahinggonyo wakatu main usai sado nan batandiang tadi tatap sanyum. Sabab tujuan samulo cuma mangaluakan paluah. Bukan untuak manyari manang.

Agak babedo jo nan tajadi  di tampek  Mak Inggih jo Datuak Kayo barabuik kurisi. Di siko jaleh barabuik mancari kalah manang. Tabujua lalu tabulintang patah. Kalah mambayia, manang manarimo. Sagalo caro dimainkan.

Pasaran  tambah angek, takalo ado nan sangajo turun ka lapangan manjadi Maju Kacau. Si Maju Kacau ko indak  manbuek main jadi tanang, malah maagiah  bola tangguang supayo sasamo pamain lago kambiang. Saketek baro tapulantiang, dikipeh jadi api. Sacacah api manyalo disiram minyak tanah. Akianyo sado nan mandakek jadi angek. Hari dingin pasaran paneh juwo.

Taraso gamang mandanga kaba nan tabarito, Mak Uniang babagi carito ka Malanca, sudah sumbayang subuah, pagi tadi. Malanca batanyo,  "Ba a mangko banyak nan jadi maju kacau tu kini, Mak. Mustinyo kalau main di bagi duo kalompok, nan balabiah tu kan surangnyo?"

"Antahlah, Nca. Mungkin banyak pamain maju kacau ko datang dari lua. Itu pulo masonyo kini,"  jawek Mak Uniang singkek.

Malanca panek


Sumber:pasbana.com
DOWNLOAD APK APLIKASI ANDROID BERITA RANAH MINANG


   

Posting Komentar

Diberdayakan oleh Blogger.