Ditulis oleh: A.S Patimarajo

Pasbana.com -- Dulu satiok musim paneh, ado acara bagurau di  kampuang Mak Uniang. Maso tu di Balai Akad dakek sikola esde di muko kantua walinagari, ado lapangan bamain anak anak. Di sinan dibuek alek karamaian kasanian randai.
Sakali wakatu, didatangan Randai Santan Batapih dari Situjuah, Banda Dalam, Payokumbuah. Salamo tujuah pakan, satiok patang Salasa, randai ko main. Anak nagari rami manonton. 

Mulai dari anak ketek sampai urang gaek. Basusun tagak bakuliliang mancaliak randai rapek rapek.

Saparo main, panitia mambiak wakatu,  sabanta lelang kue. Tujuannyo manyari pitih panumbok kaceyo alek. Kue beking dilelang ka tangah lapangan. Kue ko dipacik sabalah tangan, satinggi talingo dek anak gadih joloang gadang,  babaju kuruang basalendang.

Lelang kue ko ado duo macam. Lelang Prancis jo lelang Amerika. Kalau lelang Prancis, nan kamanarimo kue jaleh  maago paliang tenggih.  Nan ikuik lelang cuma maangkek tunjuak tangan, mahariak an harago kue  nan  dibalinyo. Taraso langang. Panonton juwo tak ado suaro.

Kalau lelang Amerika, pasarato lelang, bapacu banyak pitih jo maagiah cameeh bakeh lawan. Iko taraso angek pasaran. Pitih disiram ka panitia baru bisa mangecek. Di siko nampak kalompok anak mudo nan bapitih. Sia nan ndak bapitih, tapaso manonton sajo. Mancagun mancaliak urang main kepeang.

Anak anak mudo tu,  mamiliah lelang Amerika. Juru bicara pamacik pitih tagak ka muko. Saingek Mak Uniang kalompok nan bapitih maso itu, antaro lain namonyo Losiba. Kapanjangannyo Los Ikan Bantai. 

Patuik sajo anak anak ko banyak pitih, sabab inyo manjuwa dagiang jo manjuwa ikan tiok hari di pasa Batusangka.

Salain Losiba ado Lingkaber. Aratinyo Lingkaran Kawat Berduri. Kabanyo anak anak ko punyo kabun gatah. Kabunnyo tu dipaga kawek baduri. Tapi nan jaleh anak anak ko punyo kagiatan sahari hari nan karajonyo bisa mangasia an kepeang. Sabab kalau tak bapitih jo aa ka ditampuah galanggang rami.

Banyak kalompok anak anak lain, nan sato basuaro pulo wakatu kue dilelang. Tapi  nan bisa batahan sampai mambundar kue, hanyo kalompok nan banyak pitih, sarupo Losiba jo Lingkaber. Anak anak ko kabanyo acok mambundar kue di karamian alek  nagari.

Bundar ko mukasuiknyo mambali kue saharago dimintak panitia. Sasudah bapacu banyak pitih sambia mancamooh lawan jo baso gurau, siso harago kue tu dibayia langsuang kapanitia. Itu nan bundar. Kue ko bulek bulek utuh untuak inyo. Karano inyo nan banyak pitih. Ka inyo kue dibarikan.

Caro kini  kue beking tu bisa dilelang saharago limo juta. Kalau maso dulu, cuma sakitar limopuluah ribu. Karano pitih kini  malunak sakian kali lipek. Maso tahun tujuahpuluhan tu, harago ameh sakitar sapuluah ribu. Kini ameh bara? Tanyolah ka toko ameh.

Carito ko disampaian Mak Uniang ka Malanca sudah sumbayang subuah pagi tadi. Malanca batanyo, "Apo lo modenyo lelang kue tu, Mak?"

Mak Uniang mancontokan:

Dari Losiba: "Kami dari Losiba. Tambah saratuih. Wahai Lingkaber lagak kalian takah urang kayo, tapi tiok hari utang nan kalian tambah."

Lingkaber  manjawek: "Tambah saratuih. Dari Lingkaber!  Wahai Losiba, kalian ndak ka bisa mangalahan kami doh. Kami ko bakawan jo cukong cukong.  Tu ikan kalian  lah busuak duo embe ndak tajuwa."

Losiba mambaleh: "Tambah saratuih. Dari Losiba!!! Wahai Lingkaber. Ndak tabali ikan dek kalian. Makan sajolah keyoang racun!"

Lingkaber manjawek: "Tambah saratuih. Dari Lingkaber!!! Woi Losiba, kalau indak kalian  turunan harago dagiang, biyalah kami makan tempe satipih atm. Nan kabusuaklah dagiang kalian tu!!"

Kecek Mak Uniang, babaleh jawek sarupo iko bakapanjangan. Beko pitih saratuih saratuih tu, bisa mancapai ampek puluah ribu. Nan tatingga siso sapuluah ribu, untuak mancapai limo puluah ribu, barabuik kancang mambayia tunai.

"Bundaaarrrr!!!!" kecek  katua salahsatu kalompok lelang sambia bajalan ka tangah galanggang manarimo kue dari panitia. Panonton batapuak tangan. Mareka dapek puji urang banyak pitih. Dapek puja dapek salam, manarimo kue dari panitia di mato urang rami," jaleh Mak Uniang.

"Oo, itu yo, Mak. Yo bapitih awak mangko dapek tapuak tangan yo," kecek Malanca.
Mak Uniang maangguak ringan. Mangecek dalam hati,  layi manangkok antene 

Malanca mah....

Sumber:pasbana.com
DOWNLOAD APK APLIKASI ANDROID BERITA RANAH MINANG


   

Posting Komentar

Diberdayakan oleh Blogger.