Ditulis Oleh : A.S Patimarajo




Suatu kali dulu, maso Bulando, Apak tu lah pakai baju putiah. Sarawa itam lah takanak jo kabek pinggang cokelat. Kacomato alah dibarasiahan jo lap tangan. Sagalo surek lah talatak dalam tas sandang. Tamasuak surek kalakuan baiak.

Tiyok sabanta Apak tu, mancaliak jam tangan. Duduak di barando rumah mananti tamu ka manjapuik. Sampai  pukua sapuluah malam, tamu nan bajanji manjapuik tu ndak juwo tibo. Tambah sangah jam lai, ndak juwo ado kaba barito.

Sakijok sudah tu, dapek kaba dari utusan urang  nan bajanji ka manjapuik tadi. "Maoh yo, Pak. Apak ndak jadi kami pakai doh. Saba sajolah Apak dulu!,"  kecek utusan tu.

Apak tu tamanuang. Tamanuang panjang. Inyo manakua malu. Malu karano  maraso kanai timbang dek urang nan maagiah janji. Padohal Apak tu lah baiyobana.

Tabayang dek Apak tu, kisah nan lampau. Arok putiak kok layi kajadi buah.  Sagalo parintah lah dituruik an nyo. Sagalo pintak lah diagiahkan.

Tangiyang juwo di talingo, kutiko utusan tu mangecek. "Kini ko, hanyo Apak nan nampak dek kami. Apak urang bailemu. Sikola Apak tenggih. Hanyo Apak nan bisa basandiang jo Mak Inggih jadi Kapalo Nagari maso kan datang. Kini tingga dek Apak sajo lai. Apak tarimo atau indak?"

"Ambo pikia dulu dih," jawek Apak tu sambia mambaliak halaman kitab undang nan duo puluah.

Duo bulan sudah tu, utusan ko tibo baliak maagiah kaba. "Apak kami angkek jadi panasihat Kapalo Nagari. Iko Mak Inggih bana nan mamintak. Manarimo baganok saratuih gulden sabulan. Apak tarimo atau indak?"

"Jadih ambo tarimo. Sabab ambo paralu pitih lo maagiah guru ngaji," jawek Apak tu lunak, sambia manyenseang langan baju mambiak uluak tapi banda.

Lah jalan anam bulan. Tukang baok pasan tibo pulo baliak. "Kini Mak Inggih sadang  tapere pere  dihujat urang. Apak musti manjaweknyo di lapau Mak Karani," parintah tukang baok pasan.

"Jadih. Ndak ba a doh. Ambo lai pandai manjawek. Nan payah tu kan maanjak lasuang. Maanjak kecek tu sabantanyo," jawek Apak tu.

Di lapau Mak Karani, tiok patang Salasa,  Apak tu lah batele tele. Lah ilang ilemunyo tamakan umpan. Urang mandanga geleang kapalo.  Buah tutuanyo barubah dari nan dulu. Mak Karani sengeang sajo.

Lah jalan sapuluah bulan. Apak tu dimintak tukang baok pasan, supayo mangecek baibo ati, kutiko ado surang induak induak mambawo anak di nan rami, dipagarahan dek kawannyo. Apak tu, disuruah mangecek ibo.

Parintah utusan tadi, yo bana dilakuan Apak tu. Sungguah sungguah bana Apak tu. Bak ka mangih pulo inyo mangarang kato.

Apak tu, tasentak takalo urang rumahnyo malatak te paik di ateh meja muko kurisi. "Ndak jadi deklarasi?" tanyo Tek Baya urang rumah Apak tu.

"Ndak jadi awak doh. Inyiak Labai nan dipiliah baliau," jawek Apak tu maibo.

"Biya sajolah. Alun nasip awak lai," nasihat Tek Baya.

Mak Uniang maulang kisah ko ka Malanca sudah sumbayang subuah pagi tadi. Malanca batanyo, "Kanai PHP, Apak tu, Mak?"

"Ndak tantu dek waden PHP tu doh, Nca. Apo aratinyo tu?"

"Paagiah  Harok  Palasu," jawek Malanca. 

"Saumpamo takah itulah, Nca," jawek Mak Uniang.

Ado ado se, kecek Malanca dalam hati...
Sumber:pasbana.com
DOWNLOAD APK APLIKASI ANDROID BERITA RANAH MINANG


   

Posting Komentar

Diberdayakan oleh Blogger.