Ditulis Oleh : A.S Patimarajo




Samba randang tabuek dari dagiang. Rasonyo sero, ateh pado lamak. Makonyo tahun 2011 CNN manobatkan randang masakan nan paliang lamak dari 50 masakan nan lamak sa dunia antang. Randang ko tabuek dari babagai bumbu jo santan karambia tuwo.  Diangek an baulang ulang, sainggo barubah putiah manjadi itam. 

Paralu pangorbanan manjagonyo. Itulah randang. Asli dari Minangkabau. Barakek saba mambuek tu pulo, randang bisa dibawok bajalan jauah. Tahan bapakan pakan. Makin lamo makin lamak. Jikok capek mambangkik, baru kuniang ameh lah naik ka pinggan, ndak saba manunggu hitam, mako baru kalio namonyo. Alun randang tu lai.

Jikok di rantau, randang ko bisa sobok di Rumah Makan Padang di saluruh dunia. Jikok ado urang mahuni bintang, bulan, mars, yupiter, mako randang inshaa Allah bisa dikicok di sinan.  Takah tu bana santiangnyo randang. Nan jaleh, sadang bak ini, randang ko tamusawua  di Indonesia jo negara-negara Asia Tenggara lainnyo, sarupo Malaysia, Singapura, Brunei, Filipina sarato Thailand. 

Pado tiok tiok daerah di Minangkabau,  randang ko hidangan wajib, takalo upacara adat atau baralek. Ndak langkok manjamu tamu, jikok randang alun ado. Dek tamu takah tu pulo. Amba alek kawan kalau tak ado randang nan ka tangah.

Kutiko singgah di subarang ka patang ko, bangkik simbaba Mak Uniang ka urang rami. Pangka bala ulu masalah, ado lo sakalompok urang mangatokan inyo mambuek pulo randang nusantara. Samantaro bumbu nan dipakai pas bana jo nan ado di kampuang Mak Uniang.

Ruponyo dek urang tu, mambuek randang ko,  ditambah campua jo kicap, saus tomat sarato jinomoto bagai. Urang tu mangecek an supayo makan randang tu ado toleransi. "Wak kan samo samo makan mah. Mako kawan wak nan suko macin tu, tantu nak mancubo pulo randang," kecek urang tu ka Mak Uniang.

"Kalian carilah namo samba kalian tu namo lain. Ijan kalian sabuik pulo randang nusantara. Iko mahino. Rusak randang kami dek kalian," kecek Mak Uniang dalam debat.

"Ungku salah persepsi mah. Mukasuik kami ko, awak samo samo makan. Kami niyo maagiah randang bumbu untuak makn mie tu ha. Buliah sanang pulo kawan kami nan datang dari nagari sipiciang tu. Makonyo kami buek randang nusantara," baleh urang tu.

"Tasarah kalian lah. Pokoknyo kami di Minangkabau kami ndak butuh randang nusantara. Kami hanyo taguah makan randang sajo. Ijan kalian pasoan pulo bodoh kalian tu ka kami," kecek Mak Uniang agak dareh.

Takalo curito tu diulang Mak Uniang ka Malanca, sudah sumbayang subuah pagi tadi, Malanca mangipeh, " Yo, baitu, Mak. Ijan amuah wak bak kato inyo. Awak lah sanang makan randang sajo sahari hari. Iko nyo buek pulo randang nusantara. Kelegha!!"

"Yo bana, Nca. Gaman gaman waden mancaliak paja tu," jawek Mak Uniang sambia manggosok tinju jo tapak tangan..

"Ba a lo caro makannyo urang urang nan manbuek randang nusantara tu, Mak?" panciang  Malanca.

"Nyo bae makan tagak, sambia jalan jalan. Minun jo tangan kida. Pokoknyo jauah. Tak baradat..." jawek Mak Uniang paneh.

"Urang sasek mah Mak!" sambuang Malanca takah urang santiang bana....

Sumber:pasbana.com
DOWNLOAD APK APLIKASI ANDROID BERITA RANAH MINANG


   

Posting Komentar

Diberdayakan oleh Blogger.