Ditulis Oleh : A.S Patimarajo




Manjalang rayo kini, Mak Uniang paralu pitih untuak mambayia upah tukang. Kok ado kawan kawan, karib karabat, sanak sudaro  nan ka mambantu, Mak Uniang ucapkan tarimokasih sabanyak-banyaknyo. Kurang laweh tapak tangan jo nyiru Mak Uniang tampuang.

Curitonyo takah iko mah dunsanak. Pondok Pasantren Darul Padang Magek, Tanahdatar, nan  diuruih Mak Uniang,  kini sadang tabangkalai. Anak siak sabanyak duoratuih labih, paralu asrama baru  tampek lalok. 

Asrama nan ado kini hanyo ado duo buah saukuran  lokal sikola tampek baraja. Di sinan anak murik lalok. Di sinan pulo mareka duduak mangaji  diaja dek guru masiang masiang. Isinyo sampai tigopuluah urang salokal.

Jikok dicaliak kutiko lalok yo basalingkik di lokal ko. Salabiahnyo manumpang di surau surau masyarakat sakitar pondok. Itu tapaso basalingkik pulo. Sampai duo puluah  urang isinyo ciek surau. Surau surau kayu punyo masyarakat tu lah mulai lapuak pulo. 

Untuak maatasi supayo ndak basalingkik di surau lapuak tu. Kini panguruih mambuek  asarama  baru. Itu pulo kini nan sadang  tagak tonggak. Lantainyo baru batimbun tanah. Dindiang baru saparoh dipasang bata. Samantaro kini tukang baranti karajo. Kaadaan kauangan panguruih sadang gantuang. 

Sadang bak kini pulo wakatunyo Mak Uniang mintak toloang ka dunsanak kok ado nan kamangirim infak, sadakah,  iko no : No Rek. 5416-01-003692-53-9 Bank BRI Unit Batusangkar a/n. Pesantren Darul Ulum Padang Magek. 

Dulunyo pondok pasantren ko barupo mangaji kitab kuning di surau,  dimulai dek Ungku Salim Malin Kuniang tahun 1942. Ungku Malin Kuniang maaja di suraunyo. Namonyo surau baru. Ado murik nan juwo lalok di surau tu. Salabiahnyo tingga di surau masyarakat di sakitar surau baru.

Ungku Malin Kuniang ko maningga tahun 1987. Sajak itu mangaji surau dilanjuik an dek murik baliau banamo Ungku Anwar. Basamo jo kawan kawan lain, samaso tahun 1987, manjalang Ungku Malin Kuniang maningga,  mangaji di surau tu  diagiah namo Pasantren Darul Ulum.

Ungku Anwar Sutan Marajo ko dipakuwek dek Ungku Jakfar Imam Mudo sajak tahun 1992.  Sayang sakali Ungku Anwar maningga tahun 2014. Sahinggo sampai kini Ungku Jakfar nan malanjuik an mangaji  kitab kuning  di Pasantren Darul Ulum. 

Ungku Jakfar tatap maaja istiqomah jo kaadaan nan sangek tabateh. Baliau manjadi guru jo si Ar  istri baliau, sarato si If  anak baliau nan tuwo. Salain itu juwo ado guru guru lain bakeh murik dek Ungku Jakfar nan tatap istiqomah maaja lillahi ta'ala.

Maklum sajolah kito dunsanak, mangaji surau ko perai,  indak mambayia. Tantu pandai pandai panguruih sajo jo donatur  mausahokan mambantu kaparaluan guru guru nan maaja tu. Tamasuak  Ungku Jafar jo kaluarga.

Sakali lai Mak Uniang mohon bantuan kapado dunsanak, handai tolan, sarato saganok kaum muslimin muslimat di dunia ko. 

Saandainyo curitoko disampaian bana ka Malanca. Iramanyo  ka samo sajo. "Bantulah Mak Uniang tu, dunsanak," kecek Malanca.

Jikok dunsanak batanyo ka maa ka dikirim sumbangan tu. Pasti malanca manjawek: No Rek. 5416-01-003692-53-9 Bank BRI Unit Batusangkar a/n. Pesantren Darul Ulum Padang Magek. 

Hari ka rayo ko mah dunsanak. Mohon maaf lahir batin dari Mak Uniang jo Malanca.

Sumber:pasbana.com
DOWNLOAD APK APLIKASI ANDROID BERITA RANAH MINANG


   

Posting Komentar

Diberdayakan oleh Blogger.